Embedded Files
PART A: Pagtuon sa Bibliya: Genesis Kapitulo 9
PART A: Pagtuon sa Bibliya: Genesis Kapitulo 9
Tema: Ang Bag-ong Sinugdanan, Ang Balangaw sa Kasabotan, ug Ang Kahuyang sa Tawo
Sinulat ni: Joey Arles O. "JAO" Vergara | June 2026
Pasiuna:
Ang Genesis 9 nag-abli sa usa ka bag-ong yugto alang sa katawhan human sa dakong baha. Kini susama sa "Ikaduhang Paglalang" diin gihatagan sa Diyos si Noe ug ang iyang pamilya og higayon nga magtukod og usab sa kalibutan. Dinhi atong makita ang mga bag-ong lagda sa kinabuhi, ang nindot nga promisa sa Diyos pinaagi sa balangaw, apan lakip usab ang makapasubo nga kamatuoran nga bisan ang usa ka tawong matarong sama kang Noe, makabuhat gihapon og sayop kon dili mag-amping.
Bahin 1: Ang Bag-ong Balaod ug Ang Kabililhon sa Kinabuhi (Genesis 9:1-7)
Bahin 1: Ang Bag-ong Balaod ug Ang Kabililhon sa Kinabuhi (Genesis 9:1-7)
Ang Teksto: Gipanalanginan sa Diyos si Noe ug ang iyang mga anak, ug gisugo sila: "Panganak kamo, ug dumaghan kamo, ug pun-a ninyo ang yuta." Karon, gitugotan na sila sa pagkaon og karne sa mananap (kaniadto mga tanom lang), apan estrikto nga gidili ang pagkaon sa dugo tungod kay anaa sa dugo ang kinabuhi. Dugang pa, gipatuman sa Diyos ang balaod nga bisan kinsa nga mopatay og tawo, silotan usab sa kamatayon tungod kay ang tawo gibuhat sa hulagway sa Diyos.
Pagpatin-aw: Gihatagan sa Diyos ang tawo og awtoridad ibabaw sa mga mananap, apan nagbutang Siya og limitasyon: ang kabililhon sa kinabuhi. Ang pagdili sa pagkaon sa dugo nagtudlo kanato nga ang kinabuhi sagrado ug iya sa Diyos. Ang grabe nga silot sa pagpatay nagpamatuod kon unsa ka importante ang matag indibidwal atubangan sa Magbubuhat.
Cross References:
Buhat 15:20 - "Kondili sulatan nato sila nga magpahilayo sila gikan sa mga kahugawan sa mga idolo, ug sa pagpakighilawas, ug sa mga butang nga naluok, ug sa dugo."
Bahin 2: Ang Kasabotan sa Balangaw (Genesis 9:8-17)
Bahin 2: Ang Kasabotan sa Balangaw (Genesis 9:8-17)
Ang Teksto: Naghimo ang Diyos og usa ka walay katapusan nga kasabotan (covenant) tali Kaniya, kang Noe, ug sa tanang buhing mananap nga wala na gayuy laing lunop nga molaglag sa tibuok yuta. Isip timaan niini nga kasabotan, gibutang sa Diyos ang Iyang balangaw (rainbow) sa mga panganod. Matag higayon nga mopakita kini human sa ulan, mahinumdoman sa Diyos ang Iyang saad.
Pagpatin-aw: Hunahunaa ang trauma nga bation nila Noe kada makakita sila og ngitngit nga panganod ug makadungog og kusog nga ulan. Basin magkurog sila sa kahadlok nga moabot na usab ang baha. Busa, ang balangaw maoy usa ka dako kaayong "guarantee" o pasalig sa grasya sa Diyos. Nagpamatuod kini nga ang atong Diyos motuman gayud sa Iyang mga saad ug puno sa kaluoy.
Cross References:
Isaias 54:9 - "Kay kini sama sa mga tubig ni Noe kanako; kay maingon nga ako nanumpa nga ang mga tubig ni Noe dili na mobaha sa yuta, mao usab nanumpa ako nga dili na ako masuko kanimo..."
Bahin 3: Ang Kahuyang ni Noe ug Ang Sangpotanan sa Sala (Genesis 9:18-29)
Bahin 3: Ang Kahuyang ni Noe ug Ang Sangpotanan sa Sala (Genesis 9:18-29)
Ang Teksto: Si Noe nahimong usa ka mag-uuma ug nagtanom og kaparasan (vineyard). Usa ka adlaw, nakainom siya og bino, nahubog, ug nahuboan sulod sa iyang tolda. Ang iyang anak nga si Ham nakakita sa iyang kahubo ug sa walay pagtahod, gisumbong kini sa iyang mga igsoon sa gawas. Apan sila Sem ug Japhet, nikuha og panapton, milakaw nga nagtalikod, ug gitabonan ang ilang amahan aron dili nila makita ang iyang kaulaw. Pagmata ni Noe, iyang gitunglo ang kaliwat ni Ham (si Canaan) ug gipanalanginan sila Sem ug Japhet.
Pagpatin-aw: Kining bahina usa ka dakong pasidaan. Si Noe nga nakasugakod sa bagyo ug sa dautang kalibutan sulod sa gatusan ka tuig, nadisgrasya ra sulod sa iyang kaugalingong tolda panahon sa kalinaw. Ang iyang pagkahubog maoy nagbukas sa pultahan sa sala. Lahi usab ang kinaiya ni Ham nga nalingaw sa sayop sa iyang amahan, itandi kang Sem ug Japhet nga nagpakita og gugma ug pagtahod pinaagi sa pagtabon niini.
Cross References:
1 Corinto 10:12 - "Busa ang nagahunahuna nga siya nagabarug, magbantay nga dili siya mapukan."
1 Pedro 4:8 - "Ug labaw sa tanang mga butang, magbaton kamo ug mainiton nga paghigugmaay sa usag-usa; kay ang gugma magatabon sa panon sa mga sala."
MGA SAMPLE NGA PANGUTANA UG TUBAG ALANG SA DISKUSYON
MGA SAMPLE NGA PANGUTANA UG TUBAG ALANG SA DISKUSYON
Pangutana 1: Nganong gidili man sa Diyos ang pagkaon sa dugo gikan pa sa panahon ni Noe?
Tubag: Gidili kini tungod kay ang dugo nagrepresentar sa kinabuhi sa mananap (Levitico 17:11), ug ang kinabuhi sagrado tungod kay gikan kini sa Diyos. Bisan sa Bag-ong Tugon sulod sa Iglesia, kining sugoa gisubli aron atong tahuron ug ilhon nga ang Ginoo lamang ang Tag-iya sa kinabuhi (Buhat 15).
Pangutana 2: Unsa ang gipasabot sa balangaw alang sa mga Kristohanon karon?
Tubag: Ang balangaw usa ka pahinumdom sa grasya ug pagkamatinumanon sa Diyos. Gipakita niini nga ang kapungot sa Diyos adunay utlanan, ug kanunay Siyang nagahatag og kalinaw ug kasabotan alang niadtong misalig Kaniya.
Pangutana 3: Unsa ang leksyon nga atong makuha sa gibuhat nila Sem ug Japhet ngadto sa ilang amahan nga si Noe?
Tubag: Nagtudlo kini nga kinahanglan natong panalipdan ang dungog sa atong mga igsoon sa pagtuo. Kon ang usa ka igsoon sulod sa Iglesia makasala o mahulog (sama kang Noe), dili nato sila angay himoong tsismis o kataw-an sama sa gibuhat ni Ham. Inay nga pakaulawan, tabangan nato sila nga makabangon pinaagi sa pagpanalipod ug pagbadlong kanila sa tago.
MGA DUGANG NGA PAGTU-ON: Koneksyon Ngadto Kang Kristo ug sa Iglesia
MGA DUGANG NGA PAGTU-ON: Koneksyon Ngadto Kang Kristo ug sa Iglesia
Ang Kasabotan ug Ang Dugo ni Kristo: Ang kasabotan ni Noe gitiman-an sa usa ka balangaw. Apan kita nga anaa sa Bag-ong Tugon aduna usay mas labaw nga kasabotan (New Covenant). Imbes nga usa ka balangaw sa panganod, ang atong timaan mao ang Dugo ni Jesu-Kristo (Mateo 26:28). Tungod niini nga dugo, giluwas kita gikan sa walay-katapusang kalaglagan (impyerno).
Ang Balangaw Libot sa Trono: Sa basahon sa Pinadayag 4:3, si Apostol Juan nakakita sa trono sa Diyos didto sa langit ug adunay balangaw nga naglibot niini. Kini nagpasabot nga sa pagpanghukom sa Diyos, kanunay gihapon kining linibotan sa Iyang kaluoy ug Iyang paghinumdom sa Iyang mga saad ngadto sa Iyang Iglesia.
Ang Pagtabon sa Sala: Sama nga sila Sem ug Japhet nitabon sa kahubo ug kaulaw sa ilang amahan, si Kristo usab mao ang hingpit nga nagtabon sa atong espirituhanong kahubo. Pinaagi sa atong pagpamiyembro sa Iglesia ni Kristo (pinaagi sa bawtismo), kita gisul-oban ni Kristo (Galacia 3:27) aron ang atong kaulaw ug hugaw nga mga sala dili na makita sa atong Langitnong Amahan.
PART B: Preaching Message 1
PART B: Preaching Message 1
Tema: Ang Pana Sa Kalinaw Sa Diyos
R - Reference Verse: Genesis 9:13 ug 9:15
E - Entry Point (Hook): Nakasulay na ba mo nga naay tawo nga nakapahadlok ninyo og maayo—pananglitan, usa ka isog nga iring o iro nga hapit mo napaakan, o usa ka istriktong agalon nga nasuko ninyo? Inig sunod ninyong kita, kulbaan gihapon mo bisan og nangayo na siyag pasaylo. Ang trauma lisod kuhaon. Mao usab kana ang gibati sa pamilya ni Noe sa dihang migawas sila sa arka. Hadlok silang mag-ulan pag-usab.
C - Context: Aron wagtangon ang kahadlok sa tawo, naghimo ang Diyos og kasabotan ug nagbutang og timaan sa panganod—ang balangaw. Sa matag higayon nga mag-ulan ug adunay posibilidad sa baha, ang Diyos mopakita sa balangaw aron isulti kang Noe: "Ayaw kahadlok, nakahinumdom ko sa Akong saad. Dili ko kamo laglagon pag-usab."
H - Honor: Dalaygon ang atong Diyos kinsa kanunay motuman sa Iyang mga promisa! Ug mapasalamaton kaayo ako kaninyong mga igsoon sa Iglesia sa Ginoo. Bisan pa man kon usahay adunay mga ngitngit nga panganod sa inyong kinabuhi—sa panalapi, sa pamilya, o sa panglawas—nagpabilin kamong nagtuo nga ang Diyos dili mobiya kaninyo. Ang inyong makanunayong pagsimba mao ang inyong pagtubag sa Iyang kaluoy.
A - Admonish: Pahimangno alang kanatong tanan: ayaw kamo pagkinabuhi nga kanunay puno sa kahadlok nga daw silotan kamo sa Diyos matag sayop ninyo. Kon naa na kamo kang Kristo ug sulod sa Iyang Iglesia, ang Diyos nagatan-aw kaninyo uban ang grasya. Ayaw wad-a ang inyong pagsalig kon mag-abot ang mga unos.
R - Reteach (2 Ka Importanteng Punto):
Punto 1: Gibutang sa Diyos Ang Iyang "Pana".
(Genesis 9:13) "Gipahamutang ko ang akong balangaw diha sa panganod..."
Hebrew Word: Ang pulong alang sa balangaw mao ang "Qesheth" (kun sa english pa, gitawag kinig "a bow, a weapon of war"). Sa karaang panahon, ang Qesheth o pana maoy usa ka hinagiban. Sa dihang gibutang kini sa Diyos sa panganod, gipunting ang tunga niini paingon sa langit imbes paingon sa tawo. Nagpasabot kini nga gihunong na sa Diyos ang pagpakiggiyera o paghatag og silot, ug nagdeklarar Siyag kalinaw.
Aplikasyon: Sa atong kinabuhi sulod sa Iglesia, atong hinumdoman nga wala na nagpunting ang pana sa kapungot sa Diyos ngadto kanato. Gidawat na ni Jesu-Kristo ang maong pana didto sa krus aron makabaton kita og hingpit nga kalinaw.
Punto 2: Ang Diyos Dili Gayud Makalimot.
(Genesis 9:15) "...ug pagahinumdoman ko ang akong saad nga gihimo sa taliwala nako ug kaninyo..."
Hebrew Word: Ang pulong nga gigamit sa "pagahinumdoman" kay "Zakar" (kun sa english pa, gitawag kinig "to remember, to be mindful, or to act on behalf of"). Ang paghinumdom sa Diyos dili kay naka-amgo kalit; nagpasabot kini nga nagalihok Siya aron panalipdan ang Iyang gisaaran.
Aplikasyon: Kon sa imong pagtuo gibiyaan o nakalimtan na ka sa Ginoo sa imong mga pag-antos karon, bakak kana. Ang Diyos kanunay naga- Zakar kanimo. Iyang nakita ang imong panginahanglan ug panalipdan ka Niya base sa Iyang saad.
G - Generalize: Gihunong sa Diyos ang Iyang pana sa kasuko (Qesheth) isip timaan sa kalinaw, ug aron ipakita nga Siya kanunay mahinumdom (Zakar) sa Iyang mga saad sa kaluwasan.
E - Encourage: Busa mga igsoon, ayaw kahadlok sa mga unos sa kinabuhi! Kon mag-ulan og mga problema, pangitaa ang "balangaw" sa grasya sa Diyos diha sa inyong mga pag-ampo ug pagtuon sa Bibliya. Padayon sa inyong maayong pag-alagad sa Iglesia sa Ginoo, kay ang atong Diyos usa ka Diyos nga tigtuman sa kasabotan, karon ug sa walay kataposan!
PART C: Preaching Message 2
PART C: Preaching Message 2
Tema: Ang Kapeligrohan Human sa Dakong Kadaugan
R - Reference Verse: Genesis 9:20 ug 9:23
E - Entry Point (Hook): Nakakita na ba mo og duwa sa basketball nga ang usa ka team labaw na og 20 points sa third quarter, unya tungod sa ilang pagka-kompyansa (nag-relax kay abi nila og daog na), naapsan hinuon sila ug napildi sa last second? Sakit kaayo! Sa atong espirituhanong kinabuhi, mas dako ang risgo nga madisgrasya kita kon anaa kita sa panahon sa kalinaw ug kita nahimong kompyansa.
C - Context: Si Noe ang pinakabantugan nga tawo sa iyang panahon. Wala siya nahulog sa sala bisan pa sa pagkadautan sa kalibutan. Naluwas siya sa lunop, nagtukod og altar, ug nadawat ang panalangin sa Diyos. Apan sa dihang linaw na ang tanan ug wala nay bagyo, nagtanom siyag ubas, niinom og bino, nahubog, ug naulawan. Ang bayani sa pagtuo natumba sa sulod sa iyang kaugalingong balay tungod sa pagka-kompyansa.
H - Honor: Dalaygon ang atong Diyos kinsa mao lamang ang nagabarug nga perpekto ug balaan! Gipasidunggan ko usab kamo, mga igsoon nga dugay na sa atong Iglesia. Daghan kaninyo ang nilahutay na sa daghang tuig sa pagtuo, nakadaug na batok sa mga daan ninyong bisyo. Apan atong pasalamatan ang Diyos nga Siya nagahatag og tambag aron dili kita mahulog kon kita mag-relax.
A - Admonish: Ang akong hugot nga pahimangno karon: Ayaw kamo og kompyansa! Bisan og 20 o 30 ka tuig na kang miyembro sa Iglesia sa Ginoo, pwede ka gihapong mahulog sa tsismis, sa garbo, o sa pagkahubog kon buhian nimo ang imong pagbantay. Ang yawa dili moundang og atake, ilabi na kon ablihan nimo ang imong pultahan pinaagi sa pag-relax.
R - Reteach (2 Ka Importanteng Punto):
Punto 1: Pagbantay sa Imong Kaugalingong "Tolda".
(Genesis 9:20-21) "...nakainom siya sa bino, ug nahubog; ug siya naghubo sa sulod sa iyang tolda."
Hebrew Word: Si Noe nahimong "Shakar" (kun sa english pa, gitawag kinig "to be intoxicated or lose control"). Wala siya nakasala didto sa gawas kauban ang dautang mga tawo; nawad-an siyag kontrol didto sa lugar nga abi niyag labing luwas—sa iyang kaugalingong tolda.
Aplikasyon: Ang pinakadakong tentasyon kasagaran moabot sa panahon nga ikaw nag-inusara sa imong balay ug nag-relax (pananglitan: pag-scroll sa internet og mga dautang hulagway). Ayaw itugot nga mag- Shakar ka o mawad-an sa kontrol sa imong kaugalingon bisan sa mga pribadong higayon.
Punto 2: Taboni Ang Sayop sa Imong Igsoon.
(Genesis 9:23) "Ug si Sem ug si Japhet mikuha ug usa ka panapton... ug gitabonan ang kahubo sa ilang amahan..."
Hebrew Word: Ang pulong nga "gitabonan" mao ang "Kacah" (kun sa english pa, gitawag kinig "to cover, clothe, or hide"). Wala nila gipakatap ang sayop sa ilang amahan parehas sa gibuhat ni Ham. Mas gipili nilang mo- Kacah ug manalipod sa dungog niini uban sa respeto.
Aplikasyon: Sa sulod sa Iglesia, kon adunay igsoon nga madisgrasya sa pagpakasala, unsa may atong reaksyon? Atong i-post sa Facebook? Atong itsismis sa ubang miyembro? Dili! Ang tinuod nga Kristohanon mo- Kacah—tabonan ang igsoon pinaagi sa gugma, i-ampo, ug tambagan sa hilom aron mabalik siya sa Ginoo (Galacia 6:1).
G - Generalize: Kinahanglan tang magbantay aron dili kita mawad-an og kontrol (Shakar) panahon sa kompyansa, ug kon adunay mahulog, ato silang tabonan pinaagi sa gugma (Kacah) ug dili ipakaulaw.
E - Encourage: Busa mga igsoon ko, padayon kitang magmabinantayon! Bantayi ang inyong mga hunahuna ug ang inyong mga panimalay. Ug labaw sa tanan, palig-ona nato ang atong panaghigugmaay isip usa ka pamilya diha sa Iglesia. Tabangan nato kadtong mga nangaluya, i-ampo nato ang usag-usa, aron dungan kitang tanan nga magmadaugon hangtod sa kataposan!
Sa Diyos Lamang ang Tanang Himaya!
Page updated
Google Sites
Report abuse