Genesis 7

PART A: Pagtuon sa Bibliya: Genesis Kapitulo 7

Tema: Ang Pagsulod sa Arka, Ang Lunop, ug Ang Kaluwasan pinaagi sa Pagsunod

Sinulat ni: Joey Arles O. "JAO" Vergara | May 2026

Sermon Framework: RECHARGE (Reference Verse, Entry Point, Context, Honor, Admonish, Reteach, Generalize, Encourage)

Pasiuna:

Pagkahuman og buhat sa dako kaayong Arka nga gidugayan og pwerteng daghang katuigan, niabot na gayud ang gitakda nga adlaw sa Diyos. Ang Genesis 7 mao ang makapahadlok apan makapahingangha nga istorya sa tibuok kalibutan nga baha (lunop). Dinhi atong makita ang kalainan tali sa mga tawo nga anaa sa sulod sa Arka (nga naluwas) ug sa mga tawo nga nagpabilin sa gawas (nga nangamatay). Kini nagatudlo kanato og dako kaayong leksyon mahitungod sa hingpit nga kaluwasan.

Bahin 1: Ang Imbitasyon sa Diyos ug ang Pagsulod sa Arka (Genesis 7:1-9)

Ang Teksto: Miingon ang Diyos kang Noe, "Sulod kamo sa arka, ikaw ug ang tibuok mong panimalay; kay ikaw lamang ang nakita ko nga matarong niining panahona." Gisugo pod siya nga magdala og mga mananap, tag-pito sa mga hinlo (pwede kan-on/ihalad) ug tag-duha sa mga dili hinlo. Wala maglangay si Noe, misulod siya sumala sa gisugo kaniya.
Pagpatin-aw: Ang Diyos mao ang nag-imbitar kang Noe nga mosulod. Wala Siya miingon nga "Lakaw kamo sa arka" nga daw giabog ug pasagdan na lamang sila. Hinuon, ang pulong nga "Sulod kamo" nagpasabot nga ang Diyos mahigugmaong nagtawag kanila nga mosulod, naga-imbitar kanila ngadto sa luwas nga dapit ubos sa Iyang pag-atiman. Ang kaluwasan magsugod sa pagdawat niining imbitasyon sa Diyos pinaagi sa pagsunod. Ug dugang pa niana, wala magreklamo si Noe kon nganong daghan kaayong mananap ang ipasakay sa arka; igo ra siyang nituman.
Cross References:
- Hebreo 11:7 - "Pinaagi sa pagtuo, si Noe... nag-andam og arka aron sa pagluwas sa iyang panimalay."
- Isaias 1:18 - "Dali kamo, ug mag-husay kita, miingon ang Ginoo..."

Bahin 2: Ang Pagsugod sa Baha ug Ang Pagsira sa Pultahan (Genesis 7:10-16)

Ang Teksto: Human sa pito ka adlaw, nibuto ang mga tubod sa ilalom sa yuta ug naabli ang mga bintana sa langit. Nag-ulan og kusog kaayo sulod sa 40 ka adlaw ug 40 ka gabii. Pagsulod ni Noe, sa iyang pamilya, ug sa tanang mananap, giingon sa bersikulo 16 nga "gisira sa Diyos ang pultahan."
Pagpatin-aw: Pag-abot sa saktong oras, ang Diyos na mismo ang nisira sa pultahan sa Arka. Dili si Noe ang nag-lock niini. Nagpasabot kini nga kon isira na sa Diyos ang pultahan sa grasya, walay bisan kinsang tawo ang makaabli niini. Naluwas si Noe dili lang kay nakabuhat siyag arka, kondili kay gitrangkahan siya sa Diyos aron mahimong luwas.
Cross References:
- Pinadayag 3:7 - "...Kadtong nagabuhat sa pag-abli, ug walay makasira; ug nagasira, ug walay makaabli."
- Mateo 25:10 - (Sa sambingay sa napulo ka dalaga) "...nagsulod sila uban kaniya ngadto sa kasal: ug ang pultahan gisira."

Bahin 3: Ang Kalaglagan sa Gawas (Genesis 7:17-22)

Ang Teksto: Nagpadayon ang pag-usbaw sa tubig hangtod natabonan bisan ang kinatas-ang mga bukid. Namatay ang tanang nagaginhawa nga naa sa yuta—mga tawo, langgam, ug mga mananap.
Pagpatin-aw: Duha ra ka klase ang sitwasyon: naa sa sulod ug naa sa gawas. Walay "tunga-tunga" nga dapit. Bisag unsa pa ka buotan sa ubang tawo o kadato, kon wala sila sa sulod sa arka, nangalumos gihapon sila. Kini ang klaro nga pagpakita nga adunay gitagana nga usa lamang ka dapit sa kaluwasan ang Diyos. Kon anaa ka sa gawas sa Iyang pamaagi, kalaglagan ang padulngan.
Cross References:
- Lucas 17:26-27 - "Ug maingon sa mga adlaw ni Noe, mao man usab unya ang mahitabo sa mga adlaw sa Anak sa Tawo... miabot ang lunop ug gilaglag silang tanan."

Bahin 4: Ang Pagpabilin sa Sulod sa Arka (Genesis 7:23-24)

Ang Teksto: Si Noe lamang ug ang mga kauban niya sa sulod sa arka ang naluwas o nahabilin. Ang tubig nagpabilin sa yuta sulod sa 150 ka adlaw sa wala pa kini mihubas.
Pagpatin-aw: Wala dayon nahuman ang problema pagkahuman sa 40 ka adlaw nga ulan. Nagpabilin silang naglutaw-lutaw ibabaw sa baha sulod sa 150 ka adlaw. Wala gisaad sa Diyos nga inig sulod sa Arka wala nay kasamok, apan gisaad Niya nga luwas sila atol sa kasamok. Nagkinahanglan kinig dako kaayong pailob (patience) ang pagpabilin sa sulod hangtod nga luwas na silang makagawas.
Cross References:
- Mateo 24:13 - "Apan ang molahutay hangtod sa katapusan, mao ang maluwas."

MGA SAMPLE NGA PANGUTANA UG TUBAG ALANG SA DISKUSYON

Pangutana 1: Nganong naluwas man si Noe ug ang iyang pamilya? Unsa may iyang gibuhat nga wala buhata sa uban?

Tubag: Naluwas sila tungod kay misalig ug nituman sila sa Diyos. Pagsulti sa Diyos nga "Sulod kamo," misulod gyud sila. Ang ubang tawo lagmit nangatawa ra ug wala nituo nga naay lunop nga moabot. Kaluwasan kini nga naangkon pinaagi sa pagtuo inubanan sa buhat o pagtuman.

Pangutana 2: Unsay gipasabot sa panghitabo nga "ang Diyos mismo ang nisira sa pultahan" (Gen. 7:16)?

Tubag: Nagpasabot kini nga ang Diyos maoy nagkontrolar sa oras sa kaluwasan ug sa oras sa paghukom. Pag-abot sa panahon nga tapuson na Niya ang Iyang paghatag og higayon (grasya), Siya na ang mosira sa pultahan, ug dili na kini maablihan pag-usab sa tawo. Busa, kinahanglan mosulod samtang abli pa ang pultahan.

Pangutana 3: Unsa kadugay adiser nakanaog silang Noe sa arka?

Tubag: Kon atong kwentahon ang tibuok panahon base sa talaan sa Bibliya (gikan sa ilang pagsulod sa ika-600 nga tuig ni Noe hangtod sa ilang paggawas sa ika-601 nga tuig), miabot gayud og kapin sa usa ka tuig (mga 370 ngadto sa 377 ka adlaw) ang ilang pag-estar sa sulod. Ang 150 ka adlaw mao lang ang panahon nga nagpabilin ang baha una kini nagsugod og hubas. Busa, nagkinahanglan gayud kinig dako kaayong pailob ug paglahutay!

MGA DUGANG NGA PAGTU-ON: Koneksyon Ngadto Kang Kristo ug sa Umaabot

Kini nga kapitulo puno sa mga pagtulon-an nga direkta gayud nga nagtudlo mahitungod sa doktrina sa atong pagtuo sa Bag-ong Tugon:

Ang Usa ka Arka ug Ang Usa ka Iglesia: Sa panahon sa lunop, usa ra gyud ka Arka ang gipabuhat sa Diyos. Kadtong misulay og langoy, kumpayot sa kahoy, o tungtong sa bukid, nangamatay gihapon. Adunay usa lamang ka dapit sa kaluwasan kaniadto, ang Arka. Sa panahon nato karon, gitudlo kanato nga aduna usab usa lamang ka espirituhanong dapit sa kaluwasan, ang Iglesia ni Kristo (Efeso 4:4, Roma 16:16). Kinahanglan anaa kita sa sulod sa Iyang lawas o Iglesia aron maluwas inig abot sa Adlaw sa Paghukom.
Ang Tubig sa Lunop ug ang Bawtismo: Lahi sa panan-aw sa uban nga ang tubig kaniadto puro lang tiglaglag, alang kang Noe, ang tubig maoy nag-alsa sa arka aron sila maluwas. Si Apostol Pedro nag-ingon (1 Pedro 3:20-21) nga naluwas sila pinaagi sa tubig, ug kini nga tubig naghulagway karon sa Bawtismo nga maoy magluwas usab kanato. Sama nga ang lunop naglimpyo sa daotang kalibutan, ang bawtismo maghugas sa atong mga daan nga kasal-anan aron makasulod kita sa Arka sa Diyos, nga mao ang Iglesia.

PART B: Preaching Message 1

Tema: Ang Bugtong Pultahan Sa Kaluwasan

R - Reference Verse: Genesis 7:1 ug 7:16
E - Entry Point (Hook): Nakasulay na ba mo nga na-late mo sa pagsakay sa bus, barko, o eroplano? Naa na ka sa gawas, nakita nimo ang sakyanan, apan giingnan ka sa guwardiya, "Sir/Ma'am, bawal na mosulod, sirado na ang pultahan." Pwerteng sakita ug dako kaayong pagmahay, di ba? Ingon ani gyud ang gibati sa mga tawo sa panahon ni Noe dihang nagsugod na ang pagbundak sa kusog kaayong ulan apan sirado na ang pultahan sa Arka.
C - Context: Si Noe nag-wali sa mga tawo mahitungod sa pagkamatarong ug nagbuhat sa Arka sulod sa daghan kaayong tuig. Apan ang mga tawo igo lang nangatawa. Para kanila, buang-buang si Noe kay mag-unsa daw ang barko sa yuta nga wala man intawoy ulan kaniadto. Apan sa kalit lang, miabot ang adlaw nga gitakda sa Diyos. Gipapasulod sa Diyos si Noe, ug ang Diyos mismo ang ningsira sa pultahan. Sa dihang nagbaha na, uwahi na ang tanan alang sa uban.
H - Honor: Atong daygon ug pasidunggan ang atong Diyos! Bisan pa og magpadala Siya og silot alang sa sala, kanunay Siyang mag-andam og agianan sa kaluwasan alang kanila nga naminaw. Ug mapasalamaton kaayo ako kaninyo, mga igsoon. Kamo nga nagsige og tuon sa Bibliya ug kugihan kaayong nagatabang sa ministeryo sulod sa Iglesia, nagpamatuod kamo nga namati kamo sa Diyos. Dalaygon Siya tungod kay ania kamo sa sulod sa Iyang panalipod.
A - Admonish: Pahimangno alang kanatong tanan: ayaw kamo paglangay-langay sa inyong kaluwasan. Sayop kadtong pagtuo sa mga tawo kaniadto nga "Tugoti ko, naa man koy kaugalingong pamaagi nga maluwas." Sa Diyos, usa ra ang pamaagi. Wala nay laing sakayan. Ayaw isalig ang imong kalag sa gawas sa Iglesia; dili ka maluwas kon ikaw ra mag-inusara sa gawas.
R - Reteach (2 Ka Importanteng Punto):
- Punto 1: Kinahanglan Gyud Mosulod Ka.
  - (Genesis 7:1) "Miingon ang Diyos kang Noe, Sulod kamo sa arka..."
  - Hebrew Word: Ang pulong alang sa "sulod" o "dali dinhi" mao ang "Bo" (kun sa english pa, gitawag kinig "to enter or to come in"). Ang Diyos nagtawag kanila nga mosulod ug naga-imbitar kanila. Wala sila giabog nga daw pasagdan lamang, kondili gitawag sila aron hatagan og kaluwasan.
  - Aplikasyon: Dili igo nga mutan-aw lang ka sa Iglesia. Dili igo nga mo-agree lang ka nga maayo atong pagtulon-an. Ang pulong sa Diyos kay Bo—mosulod gayud ka. Kinahanglan nga masabtan ang insakto nga pulong sa imbetasyon gikan sa Ginoo kay pinaagi lamang sa insaktong pulong ang tao makaangkon ug insaktong pagtoo, dayon siya magpabawtismo sa insakto usab nga bawtismo aron mahimo kang opisyal nga bahin sa Iyang Arka ug maangkon nimo ang kaluwasan nga naghulat sa sulod.
- Punto 2: Pag-abot sa Oras, ang Diyos Mosira sa Pultahan.
  - (Genesis 7:16) "...ug gisira sa Diyos ang pultahan."
  - Hebrew Word: Ang pulong nga gigamit sa "gisira" kay "Sagar" (kun sa english pa, gitawag kinig "to shut or close entirely"). Gihimo kini sa Diyos aron siguradohong luwas ang naa sa sulod ug dili na makasulod ang naa sa gawas kon human na ang tagal.
  - Aplikasyon: Adunay utlanan (deadline) ang grasya sa Diyos. Usa ka adlaw, ang pultahan sa kaluwasan pagasirad-an na inig balik ni Jesu-Kristo o kon kita mamatay na dinhi sa kalibutan. Busa, samtang "abli" pa ang pultahan karon alang sa pagsangyaw sa Pulong sa Diyos, isangyaw kini sa inyong mga pamilya! Ipasulod sila samtang wala pa nag- Sagar o gisira sa Diyos ang pultahan sa kahigayonan.
G - Generalize: Gihimo sa Diyos ang Arka ug giimbitar ta nga mosulod (Bo). Apan kinahanglan tang mo-aksyon karon dayon sa dili pa Niya hingpit nga isira (Sagar) ang pultahan sa grasya.
E - Encourage: Mga igsoon, ayaw gyud kamo og paggawas sa atong espirituhanong Arka. Magpabilin kamong lig-on sa pagtuo ug magma-aktibo sa pag-alagad sa Iglesia sa Ginoo. Ug labaw sa tanan, kay abli pa man ang pultahan karon, dapita ang inyong mga higala, paryente, ug mga kaila aron mosulod ug magtuon uban kanato, aron uban kitang tanan nga maluwas inig abot sa dakong adlaw sa Ginoo!

PART C: Preaching Message 2

Tema: Ang Paglahutay ug Pailob sa Sulod sa Iglesia

R - Reference Verse: Genesis 7:23 ug 7:24
E - Entry Point (Hook): Sa mga nilabay nga pandemic, sama sa covid-19 nga panahon, masabtan natu nga ang mga tawo natanggong sa sulod sa mga panimalay. ang uban, natanggong sa sulod sa mga quarantine facility. Daghan ang mga natanggong sa mga lugar nga dili maayo ang sitwasyon. Hunahunaa ang sitwasyon ni Noe. Natanggong siya sulod sa Arka uban ang liboan ka mga hayop nga pwerteng bahoa sulod sa kapin sa usa ka tuig! Dili gayud kini usa ka "luxury cruise" o nindot nga bakasyon. Nagkinahanglan kinig dako kaayong pailob.
C - Context: Human nisulod sila ni Noe, wala dayon mihubas ang tubig o naughan ang yuta. Sa Bersikulo 24, nag-ingon nga nagpabilin ang tubig ibabaw sa yuta sulod sa 150 ka adlaw. Naglutaw-lutaw ra sila sa sulod ug naghulat. Ang kaluwasan nga gihatag sa Diyos tinuod, apan kinahanglan nila nga maghulat ug mosalig Kaniya kada adlaw.
H - Honor: Dalaygon ang atong Diyos kinsa nagapreserba kanato atol sa mga bagyo sa kinabuhi! Atong gipasidunggan ang Iyang kaayo. Ug ilabi na, gipasidunggan ug gipasalamatan ko kamong mga igsoon sa Iglesia nga nagpadayon sa pagtuon sa Bibliya ug pag-alagad. Bisan kon duna kitay daghang kasamok, mga problema, ug usahay maglalisay sa sulod, nagpabilin kamong nag-alagad ug wala nilayas. Kamo ang mga buhing ehemplo sa mga Kristohanon nga dunay tinuod nga pailob.
A - Admonish: Ang akong pahimangno kaninyo karon: Ayaw kamo og ambak gikan sa atong Arka! Usahay, adunay mga Kristohanon nga kapuyan na, mabungol, o masakitan sa batasan sa laing miyembro, maong moingon sila, "Mobiya na lang ko sa Iglesia." Pahinumdom, igsoon: kon molayas ka sa Arka tungod sa baho sa uban, malumos ka sa gawas. Mas maayo pa ang mag-antos ginagmay sa sulod kaysa mamatay sa gawas.
R - Reteach (2 Ka Importanteng Punto):
- Punto 1: Ang Diyos Nagapanalipod sa mga Nahabilin.
  - (Genesis 7:23) "...Si Noe lamang ug ang mga kauban niya sa sulod sa arka ang naluwas (nahabilin)."
  - Hebrew Word: Ang pulong alang sa "naluwas" o "nahabilin" mao ang "Sha'ar" (kun sa english pa, gitawag kinig "to be left over or to remain as a remnant"). Ang kalibutan nahanaw, apan ang Diyos misiguro nga ang mga tawo nga nagpabilin o nag- Sha'ar sa sulod sa Iyang pamaagi walay bisan usa nga nalumos.
  - Aplikasyon: Ang Iglesia mao ang remnant o ang nahabilin sa Diyos. Bisan unsa kabaho o kagubot ang kinabuhi dinhi sa kalibutan, kon magpabilin (mag- Sha'ar) ka sa sulod sa Iglesia, sigurado ang imong kaluwasan. I-antos lang ang mga ginagmay nga kasamok, ayaw ibaylo ang imong kaluwasan tungod lang sa emosyon.
- Punto 2: Ang Tubig Gamhanan, Apan ang Diyos Mas Gamhanan.
  - (Genesis 7:24) "Ang tubig nagpabilin (midako/nilapaw) sa yuta sulod sa 150 ka adlaw."
  - Hebrew Word: Ang orihinal nga pulong nga gigamit dinhi mao ang "Gabar" (kun sa english pa, gitawag kinig "to prevail or be mighty"). Nagpasabot kini nga gamhanan kaayo ang tubig ug gitabonan niini ang tanan. Apan bisan unsa pa ka Gabar ang tubig, ang arka gipataas ug wala gayud naunlod.
  - Aplikasyon: Sa atong kinabuhi, usahay bation nato nga ang mga problema daw mag- Gabar o molapaw na—mga utang, balatian, o away sa pamilya. Apan isip mga anak sa Diyos, bisan motaas pa ang tubig sa problema, iga-alsa ug igapasaka ka sa grasya sa Diyos basta dili ka mubiya sa Iyang Iglesia.
G - Generalize: Bisan unsa pa kagrabe ang bagyo ug baha sa gawas nga mo-lapaw (Gabar), kon kita andam magpabilin (Sha'ar) nga luwas sa sulod sa Iyang Iglesia, madawat nato ang hingpit nga kadaugan.
E - Encourage: Busa mga igsoon ko, padayon kita sa paglahutay! Ayaw pagmahay nga nagsimba kamo ug nag-alagad kanunay. Ipadayon ninyo ang maong kakugi. Pagbaton kamo og taas nga pailob sa inyong mga igsoon sa pagtuo kay parehas ra tang tanan nga naglawig padulong sa langit. Magpabilin kita sa sulod sa Iglesia sa Ginoo hangtod nga molinaw na ang tanan!

Sa Diyos Lamang ang Tanang Himaya!

Page updated

Google Sites

Report abuse